२०१२ सालमा खैरहनी गा.वि.स. वडा नं. ३ मझुईमा प्राइमरी विद्यालयको नाममा विद्यालयको स्थापना भएको पाइन्छ । त्यसको ६ महिनापछि यस विद्यालयलाई सुल्तानामा स्थानान्तरण गरियो । वि.सं. २०१४ सालमा पुनः यसलाई खैरहनी गाउँमा स्थानान्तरण गरियो । खैरहनीबाट हालको यस स्थानमा विद्यालयको स्थानान्तरण भएको पाइन्छ । यस विद्यालयको संस्थापक स्व. कीशोरचन्द्र ढुंगाना हुनुहुन्थ्यो ।

स्थापनाकाल वि.सं. २०१४ सालमा यस विद्यालयको नाम श्री खैरहनी प्राइमरी स्कूल भएको र वि.सं. २०२० सालमा महेन्द्र विद्याश्रमको नाम दिई संचालनमा रहेको यस विद्यालयको नाम वि.सं. २०२४ सालमा पृथ्वी मा.वि. का रुपमा परिवर्तन गरिए पश्चात् पुनः श्री खैरहनी मा.वि. कायम गरिएको पाइन्छ । यो विद्यालय श्री खैरहनी मा.वि., खैरहनी चितवनका नामबाट अद्यावधि परिचित छ ।